Guwahati ke Barsapara Cricket Stadium mein aaj shaam Indian Premier League 2026 ka 13va mukabla Rajasthan Royals aur Mumbai Indians ke beech khela jayega. Match shaam 7:30 baje shuru hoga aur dono teams jeet ke liye poori taiyaari ke saath maidan mein utregi.
Rajasthan Royals ki kaptani Riyan Parag ke haath mein hai, jo apne home region mein strong performance dene ki koshish karenge. Team ke liye Yashasvi Jaiswal aur Ravindra Jadeja jaise khiladi mahatvapurn honge, jabki Jofra Archer ki pace bowling Mumbai ke batsmen ke liye chunauti ban sakti hai.
Dusri taraf, Mumbai Indians ki agwai Suryakumar Yadav kar rahe hain. Team mein Rohit Sharma, Jasprit Bumrah aur Hardik Pandya jaise anubhavhi khiladi shamil hain, jo kisi bhi waqt match ka rukh badal sakte hain.
Pitch report ke mutabik, Barsapara ka maidan batting ke liye anukul mana jata hai, jahan high-scoring match dekhne ko mil sakta hai. Dew factor bhi aham bhoomika nibha sakta hai, isliye toss jeetne wali team pehle bowling chun sakti hai.
Dono teams ke beech yeh mukabla kaafi romanchak hone ki umeed hai, jahan ek taraf Rajasthan ki all-round strength hai, to doosri taraf Mumbai ki majboot bowling lineup. Fans ko ek close contest dekhne ko mil sakta hai.
Toss delayed due to baarish
Guwahati ke Barsapara Cricket Stadium mein RR vs MI match se pehle baarish ne khel bigaad diya hai, jiske chalte toss delay ho gaya hai. Mausam vibhaag ke anusaar aaj thunderstorm aur light to moderate rain ki sambhavana bani hui hai, jisse match ke start hone mein deri ho sakti hai. Ground staff covers ke saath lagatar mehnat kar raha hai, lekin fans ke liye intezaar badhta ja raha hai. Agar baarish jaldi rukti hai to reduced overs match dekhne ko mil sakta hai, warna no result ka bhi khatra bana hua hai.